Հայաստանն այն երկիրն է, որը գեղեցիկ ու հետաքրքիր է տարվա բոլոր եղանակներին։ Մարդկանց մի տեսակ կա, որ, ի զարմանս մյուսների, շատ սիրում է ձմեռը, այն էլ ձյունառատ։ Մեր երկիրն առաջարկում է հետաքրքիր տարբերակներ հենց ձմռան սիրահարների համար։ Հենց դրա շնորհիվ էլ զբոսաշրջիկների թիվը բավականին շատ է նաև դեկտեմբեր-փետրվար ամիսներին։
Ձմեռային մարզաձևերի սիրահարների համար Հայաստանում բազմաթիվ իրադարձություններ են լինում:
Սառը եղանակին ամենաշատ այցելվող ուղղությունը եղել և մնում է հրաշալի Ծաղկաձորը: Սա Հայաստանի երեք առողջարանային քաղաքներից մեկն է, մի վայր, որը սիրված և նախընտրելի է բոլոր տեղացիների և զբոսաշրջիկների կողմից: Ձմեռային առողջարանային այս քաղաքը գտնվում է Կոտայքի մարզում ՝ Երևանից ոչ հեռու:
Ինչո՞վ կարելի է զբաղվել ձմռանը Հայաստանում։
Դահուկավազք
Առաջին լեռնադահուկային հանգստավայրը բացվել է 1986 թ.-ին Ծաղկաձորի գլխավոր օլիմպիական մարզական համալիրի հարևանությամբ: Այստեղ կարելի է լեռնադահուկավազքով զբաղվել և սահել Թեգենիս լեռան լանջով: Կա նաև ճոպանուղի, որը ծովի մակարդակից 1966-2819 մետր է և աշխատում է երկու ուղղությամբ:
Ճոպանուղին գործում է 1967 թվականից և ունի 30 կմ երկարություն: Ծաղկաձորում կարող եք այցելել նաև տեղի հայտնի Կեչառիս եկեղեցին: Այս փոքր քաղաքը գրեթե միշտ մարդաշատ է։
Եթե Դուք պրոֆեսիոնալ եք, կարող եք փորձել դահուկներ վարել Արագած լեռան լանջին՝ հիանալի վայր նաև պրոֆեսիոնալ ալպինիստների և ձմեռային մարզաձևերի սիրահարների համար: Արա և Հատիս լեռները նույնպես հարմար են լեռնագնացության համար: Եթե սիրում եք նոր դժվարություններ հաղթահարել, ապա այս մարզաձևը ձեզ համար է: Հայկական լեռները ձեզ հնարավորություն կտան լրացնել ձեր կյանքը նոր և վառ տպավորություններով:
Չմշկասահք
Նրանք, ովքեր սիրում են սահադաշտն ու չմուշկները, կարող են հիանալի ժամանակ անցկացնել հենց մայրաքաղաքում: Գլխավոր ու ամենահայտնի սահադաշտը թերևս Երևանի կենտրոնում գտնվող «Կարապի լիճն» է, որը ձմռանը դառնում է սահադաշտ։
Սա մայրաքաղաքի ամենագեղեցիկ վայրերից մեկն է: Ամռանն այն արհեստական լիճ է, որն, ի դեպ, սարքված է Սևանա լճի նման, որում լողում են մի քանի կարապ։ Այստեղ նաև շատ հաճախ կազմակերպվում են փառատոններ և համերգներ։
Թռիչք զիփլայնով
Եթե ադրենալինի պակաս ունեք, ուրեմն հետևեք մեր խորհրդին ու փորձեք զիփլայնով թռիչքը հենց ձմռանը։ Դրա հնարավորությունը կա թե Երևանում, թե Ծաղակաձորում ու Դիլիջանում ու թե Ենոքավանում, որտեղ գտնվում է Հայաստանի առաջին էքստեմալ պարկը։
