Վահագնի և Աստղիկի ջրվեժները գտնվում են Արարատի մարզում՝ «Խոսրովի անտառ» պետական արգելոցի տարածքում։ Արգելոցը ներառում է Ազատ և Վեդի գետերի ավազանները, իսկ պետական կանոնադրությամբ դրա պահպանության հիմնական նպատակներից մեկը հենց այդ ավազանների ջրային և ցամաքային բնական էկոհամակարգերի բնականոն զարգացման ապահովումն է։
Արգելոցի տարածքում կան մի քանի այլ ջրվեժներ ևս և ջրվեժների խումբը հայտնի է նաև Աղջոց ջրվեժներ անունով։
Աստղիկը հին հայկական դիցարանում կապվել է սիրո և գեղեցկության հետ, իսկ Վահագնը՝ քաջության, պատերազմի, ամպրոպի և վիշապամարտության հետ։ Հին հայկական դիցարանում Վահագնի և Աստղիկի սերը համարվել է սրբազան միություն, որը կյանք, անձրև, բերք ու բարիք է բերել երկրին։
