Դադիվանք

Հիասքանչ Դադիվանքը Արցախի ամենագեղեցիկ եկեղեցիներից մեկն է: Այն կառուցվել է 9-13-րդ դարերում: Եկեղեցին գտնվում է Դադիվան լեռան լանջին, Լեռնային Ղարաբաղի Դադիվանք գյուղի մոտակայքում: Այն կոչվել է նաև Խութավանք, քանի որ կառուցվել է խութի՝ բլրի վրա:

Ավանդության համաձայն՝ եկեղեցին հիմնվել է 1-ին դարում՝ Քրիստոսի առաքյալներից Թադևոսի հետևորդ Դադեի կողմից, որը քրիստոնեություն էր քարոզում Հայաստանի այս շրջանում։  2007 թվականին իրականացված պեղումների ընթացքում վանական համալիրի եկեղեցիներից մեկի խորանի տակ գտնվել են սուրբ Դադե առաքյալի մասունքները։

Պատմական արձանագրություներում եկեղեցին առաջին անգամ հիշատակվել է Մխիթար Գոշի կողմից, ով որոշ ժամանակ ապրել և աշխատել է Դադիվանքում: 

Վանական համալիրի առաջին շինությունները կառուցվել են 9-րդ դարում: Սակայն 12-րդ դարում համալիրը հրկիզվել է սելջուկ զավթիչների կողմից և վերականգնվել է ավելի քան երկու տասնամյակ անց:

Համալիրը ներառում է երկու եկեղեցի, երկու մատուռ, միաբանական խցեր, գրատուն, սեղանատուն, հյուրատուն և այլ շինություններ: Վանքի գլխավոր եկեղեցին Կաթողիկեն է, որը կառուցվել է 1214-ին:Կաթողիկեի հարակից տարածքում 13-րդ դարի միանավ եկեղեցին է և գավիթը: Վանքի զանգակատունը նույնպես կառուցվել է 13-րդ դարում:

Շրջապատված բարձր լեռներով, խիտ անտառներով և կիրճերով այս հիանալի վայրը տարածաշրջանի ամենասիրված տուրիստական ​​վայրերից մեկն է: