Երևանի բուսաբանական այգի

Երևանի բուսաբանական այգի

September 18, 2017

Stop Azerbaijani Aggression

Երևանի բուսաբանական այգին գիտական, էկոկրթական, ուսումնական և ռեկրեացիոն նշանակության հաստատություն է, որի գործունեության հիմնական նպատակն է տարբեր տարածաշրջաններից դեկորատիվ և տնտեսապես արժեքավոր բուսատեսակների ներմուծումը, ցուցադրական գիտական հավաքածուների ստեղծումը, էկոլոգիական նոր պայմաններին դրանց հարմարողականության բացահայտումը, առավել հարմարված տեսակները քաղաքների և բնակավայրերի կանաչապատման մեջ ներդրումը։

Այգին հիմնադրվել է 1935 թվականին անվանի գիտնականներ՝ Ա.Կ. Մաղաքյանի, Ա.Ա. Հախվերդովի և Ն.Վ. Միրզոևայի կողմից։ Տարածքը զբաղեցնում է 80 հա, որտեղ ներկայացված շուրջ 1100 բուսատեսակներից շատերը էնդեմիկ, հազվագյուտ և անհետացող բույսատեսակներ են։ Դրանցից 38-ը ներառված են Հայաստանի Կարմիր գրքում: 

Երևանի բուսաբանական այգի

Բուսաբանական այգու տարբեր էքսպոզիցիոն փոքր պուրակներում ներկայացված են մի շարք հետաքրքիր տեսակներ, իսկ կոլեկցիոն հողամասում՝ Հայաստանի մշակովի բույսերի վայրի ցեղակիցների մոտ 200 տեսակ։ 

Աճեցվող հազվագյուտ տեսակներից են՝

  • Galanthus alpinus
  • Centaurea erivanensis
  • Astragalus paradoxus
  • Onobrychis hajastana
  • Ribes armenum
  • Iris elegantissima
  • Iris grossheimii
  • Triticum araraticum
  • Triticum urartu
  • Zelkova carpinifolia

 

Վերջին տարիներին համալրվել են բուսաբանական այգու դենդրոհավաքածուները, արևադարձային ու մերձարևադարձային բուսական ֆոնդը շուրջ 30 նոր տեսակով, իսկ ծաղկային բույսերինը՝ 12 տեսակով։ Բարեկարգվել և ձևավորվել է կոլեկցիոն վարդանոցի մերձակա մոտ 1 հա տարածքը, որտեղ տնկվել է 40 տեսակի ավելի քան 1000 հատ ծառաբույս։

Հողամասի մոտ 4 հա տարածքում ստեղծված է նաև Հայաստանի բուսական համակեցությունների թվով 16 մոդելներ (արհեստական ցենոզներ), որոնց մեջ կան նաև այն խմբավորումները, որոնք բնության մեջ գտնվում են անհետացման եզրին։

Այգու ջերմատանը ժամանակին ներկայացված էր արևադարձային և մերձարևադարձային բույսերի 1260 տեսակ։ Այժմ տեսականու թիվը հասնում է 300-ի։ Այստեղ առանձին տեղաբաշխված են աշխարհի տարբեր մասերի դենդրոֆլորաների ներկայացուցիչներ։ Այգու վարդերի հավաքածուն կազմում է 27 սորտի վարդ, որոնք լավ հարմարվել են այգու կտրուկ փոփոխվող կլիմայական պայմաններին։

Բուսաբանական այգի, կակտուս

Երևանի բուսաբանական այգին ազգային արժեք ներկայացող եզակի պարտեզ է, որն ունի ավելի քան 80 տարվա պատմություն: Այգին իր բնույթով միջազգային հռչակ է վայելում և համարվում է ոլորտի առաջատար գիտական ​​հաստատություններից մեկը:

Բուսաբանական այգին մայրաքաղաքի բնակիչների համար ծառայում է որպես յուրահատուկ հանգստի գոտի։ Այստեղ կարող եք զբոսնել, պիկնիկ կազմակերպել, զբաղվել սպորտով, հեծանիվ քշել, ինչպես նաև անցկացնել ձեր հարսանեկան ֆոտոսեսիան։ 

Հիշեցնենք, որ մուտքը ընդամենը 300 դրամ է:

 

Ձեզ կհետաքրքրի նաև