Հայաստանում ռաֆթինգ

Նախ պարզենք, թե ինչ է այն իրենից ներկայացնում։ Ռաֆթինգը վայրի գետերի հոսանքով իջնելն է հատուկ փչովի նավակներով։ Մեկ նավակում սովորաբար տեղավորվում է 4-ից 20 հոգի։ Հայաստանում սա համեմատաբար նոր ուղղություն է թե՛ որպես պրոֆեսիոնալ սպորտաձև, թե՛ որպես արկածային տուրիզմ։

Եթե էքստրիմի սիրահար եք, ապա ուրախ կլինեք իմանալ, որ ռաֆթինգն այսօր Հայաստանում ամենապահանջված էքստրեմալ ժամանցներից մեկն է։ Սա ևս մեկ ապացույց է, որ մեր երկիրը զբոսաշրջիկներին առաջարկելու շատ ավելին ունի, քան միայն հնագույն եկեղեցիներն ու պատմամշակութային հուշարձանները։

Ռաֆթինգի լավագույն վայրերը Հայաստանում

2017 թվականին Լոռու մարզում հիմնադրվեց «Ռաֆթինգ Արմենիա» ընկերությունը՝ Հայաստանում ռաֆթինգի մոտեցումներն ու տեխնիկաները զարգացնելու նպատակով։

Ռաֆթինգի որոշակի փորձ ունեցող մարդիկ կարող են առաջարկել այս արկածային տեսակը 3 տարբեր ուղղություններով։ Այս ուղղությունները ձեզ կհասցնեն երկրի ամենաարագահոս գետերին։

Ռաֆթինգ Ձորագետում

Ձորագետը գտնվում է Լոռու մարզում՝ Ստեփանավան քաղաքի հարևանությամբ (Երևանից մոտ 160 կմ հեռավորության վրա)։ Ռաֆթինգի մեկնարկը սովորաբար տրվում է քաղաքից ընդամենը 2 կմ հեռավորությունից։

Բարդության աստիճանը և տևողությունը

Այս գետը համարվում է Հայաստանի ամենաբարդ և էքստրեմալ երթուղիներից մեկը։ Կախված գետի հատվածից և ջրի մակարդակից՝ բարդությունը կարող է հասնել 4-րդ կամ 5-րդ կարգի (միջազգային սանդղակով 6-րդ կարգը համարվում է գրեթե անանցանելի և վտանգավոր կյանքի համար)։

Արշավի տևողությունը կարող է տատանվել 4-ից 7 օրվա միջակայքում։ Այն ուղիղ համեմատական է.

1. Խմբի պատրաստվածությանն ու փորձին,
2. Եղանակային պայմաններին,
3. Գետի ջրի մակարդակին և հոսանքի արագությանը։

Լավագույն ժամանակահատվածը

Ձորագետում ռաֆթինգի համար լավագույն ժամանակը գարունն է, հատկապես մայիս ամիսը։ Այս շրջանում ձնհալի հաշվին ջրի մակարդակը հասնում է իր առավելագույնին, ինչն ապահովում է անհրաժեշտ արագությունն ու էքստրիմը։

Ռաֆթինգ և մշակույթ

Ամռանը ջրի մակարդակը համեմատաբար իջնում է, ինչը թույլ է տալիս ավելի հանգիստ տեմպով վայելել կիրճի հիասքանչ բնությունը։ Ջրային արշավի ընթացքում կարող եք տեսնել պատմամշակութային բացառիկ հուշարձաններ, ինչպիսիք են.

1. Լոռի Բերդ ամրոցը,
2. Հնեվանքի վանական համալիրը,
3. Ուրուտ գետի միջնադարյան կամուրջը և այլ տեսարժան վայրեր։

Ռաֆթինգ Հայաստանում. Քասաղ գետ

Քասաղ գետը սկիզբ է առնում Արագած լեռան լանջերից (Արագածոտնի մարզ) և հոսելով դեպի հարավ՝ թափվում է Մեծամոր գետը։ Ի տարբերություն Հայաստանի այլ լեռնային գետերի, Քասաղի բարդության աստիճանը գնահատվում է 3-րդ կարգի։

Ռաֆթինգ սկսնակների համար

Սա նշանակում է, որ Քասաղում ռաֆթինգը համեմատաբար հեշտ է և անվտանգ։ Այն հիանալի ընտրություն է.

1. Սկսնակների համար, ովքեր չունեն մեծ փորձ ռաֆթինգում,
2. Ակտիվ հանգստի սիրահարների համար, ովքեր ուզում են վայելել բնությունը՝ առանց չափազանց մեծ ռիսկի դիմելու։

Չնայած համեմատաբար հեշտ ընթացքին, գետի կիրճի գեղեցկությունն ու պատմական հուշարձանների մոտով անցնելը սա դարձնում են Հայաստանի ամենատպավորիչ ջրային երթուղիներից մեկը։

Ռաֆթինգ Հայաստանում. Դեբետ գետ

Դեբեդը ձևավորվում է Փամբակ և Ձորագետ գետերի միախառնումից և ունի 152 կմ երկարություն։ Ինչպես Քասաղի դեպքում, Դեբեդի հիմնական երթուղիներն ունեն 3-րդ կարգի բարդություն։ Սա նշանակում է, որ գետը հարմար է ինչպես փորձառու մարզիկների, այնպես էլ սկսնակների համար, ովքեր առաջին անգամ են նստում նավակ։

Դեբեդում ռաֆթինգի սեզոնն ավելի երկար է, քան մյուս գետերում։ Լավագույն ժամանակը հունիսից հոկտեմբերն է։ Այս ամիսներին ջրի մակարդակը կայուն է, իսկ Լոռվա մեղմ եղանակը հնարավորություն է տալիս լիարժեք վայելել արկածը։

Գետի մոտ կան Հայաստանի մի շարք գեղեցիկ տեսարժան վայրեր։ Դրանցից են Հաղպատի, Սանահինի, Բարձրաքաշ Սուրբ Գրիգոր վանքի և այլ հնամենի կոթողների տեսարանները։

Օգտակար խորհուրդներ

Եթե դուք սկսնակ եք նման ծայրահեղ զբոսաշրջության մեջ, Ձեզ կհետաքրքրեն հետևյալ օգտակար խորհուրդները Հայաստանում ռաֆթինգի մասին։

✔ Նախ և առաջ, հաղթահարեք ձեր վախերը, եթե ունեք դրանք։

✔ Լսեք հրահանգներին և վստահեք պրոֆեսիոնալ հրահանգիչներին, ովքեր ուղեկցում են ձեզ Հայաստանի լեռնային գետերով։

✔ Համոզվեք, որ ծանոթ եք բոլոր անվտանգության կանոններին և հետևում եք դրանց։

✔ Մի մոռացեք կրել համապատասխան համազգեստ։ Նաև համոզվեք, որ ունեք փոխարինող հագուստ և կոշիկներ․ սա ճիշտ և անհրաժեշտ քայլ է։

✔ Հիշեք, որ դուք ճիշտ նավարկության կարևոր անդամ եք։ Նավակում գտնվող յուրաքանչյուր անձ կախված է խմբի մյուս անդամներից և թիմային աշխատանքից։

✔ Հետևեք հրահանգչի ցուցումներին, քանի որ նրանք են վերահսկում իրավիճակը և գիտեն գետի բոլոր առանձնահատկությունները։

✔ Եվ ամենակարևորը՝ մի մոռացեք ունենալ ջրակայուն տեսախցիկներ կամ նմանատիպ տեխնիկական սարքավորումներ՝ այս խենթ պահերը ֆիքսելու և Հայաստանի բնության գրկում ստացած այդ զգացմունքները անմահացնելու համար։

Հայաստանում ռաֆթինգը ձեզ կպարգևի մեծ քանակությամբ ադրենալին և արկածախնդրության նոր աղբյուրներ։